Ürəyinizdə Günəş olsun, sayğılı yurddaşlarımız!
Bu gün Soylu Atalının “Pıçıldayan Damcılar” kitabı çapdan çıxdı. Kitab “Elm və Təhsil” nəşriyyatında yığılmışdır. Kitabın elektron variantı asifataocagi.com saytında, “Soylu.A” bölümündə yerləşdirilmişdir.
Burada Soylu Atalının öz kitabına yazdığı “Ön Sözü” sunuruq.
Ön söz
Ürəyində Ata Günəşi olsun, sayğılı oxucu.
Belə götürəndə şeir kitabı ilə görüşünə gəlmək istəməzdim. Çünkü mən şair deyiləm, olmaq istəyim olmayıb da. Məncə, Azərbaycan şeir planını çoxdan doldurub. Şeir yazmaqda, bir də müğənni istehsal eləməkdə çox bərk gedirik. Balaca şöhrətlə pul hərisliyi bizim toplumumuzu şeirçiliyə, bir də müğənniçiliyə sürüyür. Bundan yaxa qurtarmaq gərəkdir. Qulaq-göz əzbərçiliyi ilə şeir yazanlar o qədər çoxalıb, Söz urvatdan düşür.
Bütün bunlara baxmayaraq, mən də belə bir şeir kitabı ortaya çıxarıram. Bu şeirlər bədii cəhətdən mükəmməl olmaya bilər. Ancaq burada mənim səmimi yaşantılarım var. Ayrı-ayrı anlarda, gerçəkdən, elə duyğular selinə bürünmüşəm, o hallarımı şeirvari ifadə eləməli olmuşam. Mən Asif Atanı tanıyandan sonra hər yöndən (ilk çağlarda) çətinliklərlə, sarsıntılarla üz-üzə qalmışam. Sərt təpkilərin arasından çıxmışam, yanlışların içindən keçmişəm, ancaq bütün hallarda özümə doğru yürümüşəm. İnsanlığın qayğıları ağlıma, düşüncəmə oturduqca yerişlərim çətinləşib, ruhsal gərginliklərim ara vermədən sıxıntılar yaşadıb mənə. Bununla belə, Yolumdan dönməmişəm, vəzifəyə tamahlanmamışam, şöhrətə aldanmamışam.
Bu dediklərim bu kitabımda bir çox cəhətləriylə özünü göstəribdir.
Aşırı duyğusal şeirlərim də vardı, sayı yüzə yaxın olub. Onları sildim, əlyazı biçimində belə saxlamağı uyğun saymadım. Amalımla, əqidəmlə səsləşən duyğularımı isə ürək qızdırıb səninlə bölüşmək istədim.
Ürəyinə təpər, gözlərinə sağlıq diləyirəm.
Ata Ruhu sənə yar olsun.
Yükümüzdən Böyük Fərəhimiz yoxdur!
